Trabalhs de manteniment enes entorns dera Val d'Aran a cargue deth Conselh Generau d'Aran
24/08/2023
Entà milhorar es entorns deth territòri e qu'es vesins e visitants ac poguen gaudir
Pendent es darrères setmanes, era Brigada de Servicis deth Conselh Generau d'Aran (SAVA) a amiat a tèrme un trabalh continuat de neteja, manteniment e suenh des nòsti camins, pòbles e montanhes.
D'un costat, pendent es darrèri dies an amiat a tèrme eth desbrossament e neteja de vegetacion de diuèrsi airaus coma eth Santet de Gausac - Gèles, es lateraus dera pista d'Aiguamòg o es accèssi ath pòble de Betlan, entre d'auti.
Enguan, pr'amor des condicions meteorologiques, a estat un an de fòrça vegetacion enes pistes e camins vesiaus. Açò a dificultat eth trabalh dera brigada que, totun, a amiat a tèrme un gran trabalh en tot desbrossar camins e pòbles, metent especiau atencion ad aqueri endrets pes quaus ei previst que passen es diuèrses corses e competicions qu'acuelh eth nòste territòri.
Atau madeish s'a reparat era passarèla deth camin de Betren a Escunhau, s'a trabalhat damb ua retroexcavadora ena pista de Tuca-Sarrahèra entà trèir pèires queigudes, apraiar horats e canalizar es passi d'aigua, s'an plaçat tanben senhalizacions d'avertiment en zònes de bestiar e s'a netejat eth canal de regans de Marcatosa de pèires, vegetacion e hanga.
Àlvar Ordoñez