Signat eth conveni entre er Ajuntament e La Caixa entath Centre de Joenessa de Vielha

Dejà a agut lòc era signatura deth conveni entre er Ajuntament de Vielha e Mijaran e era òbra sociau “La Caixa” entà dotar de mobiliari eth nau centre de joenessa que se demore auer prèst en pòc temps en cap-lòc aranés.

En aguesta prumèra fasa deth projècte, dotada d’ua inversion de 30.000 euròs, se condicionarà era planta baisha der antic aucider entà organizar activitats variades destinades as joeni. Est an que ven s’a previst contunhar es òbres ena planta superior entà auer condicionat tot er edifici.

Era creacion d’un centre dedicat as joeni ère un projècte qu’er Ajuntament dejà portaue fòrça mesi premanint, pr’amor que se considère qu’aguest collectiu non auie cap espaci damb auferta d’activitats d’òci e formacion.

Aguesta collaboracion damb era Fondacion Bancària “La Caixa” ei un des projèctes qu’era entitat realize damb er objectiu de retornar sòs ara societat.

Er Ajuntament de Vielha e Mijaran a mostrat era sua gratitud damb era Fondacion Bancària “La Caixa” e eth sòn desir de contunhar trebalhant amassa en projèctes que faciliten era vida des ciutadans aranesi.