S'estree era caudèra de biomassa der Espitau Val d'Aran
Damb eth prètzhèt d'estauviar fòrça recorsi e contribuïr damb es energies sostenibles
Es Servicis Assistenciaus Integradi deth Conselh Generau d’Aran an metut en marcha eth sistèma de cauhatge d’aigua per miei de dues caudères de 300KW que foncionen damb biomassa. Er equipament, qu’a auut un còst totau de 560.000 èuros, finançadi pera Deputacion de Lhèida, ja ei en foncionament.
Er equipament se trape en ua sala der Espitau de 58m2 e un depòsit de quaranta mètres carrats, tara acumulacion de 160m3 d’estèra, que corbiràn es besonhs de cauhatge der Espitau e ua part dera Residéncia Sant Antòni damb ua autonomia de foncionament de 15 dies. Era sala compde tanben damb un sistèma de pompatge e canalizacion que connècte damb eth sistèma centrau de distribucion, tant d’aigua cauda sanitària coma de cauhatge.
Aguesta caudèra supausarà un gran estauviament annau a nivèu energetic e de còsti.
Aguest ei eth prumèr emplaçament qu’emplegue biomassa e n’i aurà d’auti en un futur coma per exemple eth de Naut Aran, en Salardú.
