Se preten recuperar eth tram deth Camin de Santiago que passe pera Val d'Aran

Eth passat dimèrcles, 10 de mai, auec lòc en Conselh Comarcau dera Nauta Ribagorça era prumèra amassada sus eth projècte de recuperacion deth Camin de Santiago, des de Saint Bertrand de Comminges a Roda d'Isábena, passant pera Val d'Aran.

Eth projècte a estat impulsat pera Associacion d'Amics deth Camin de Santiago ena Val d'Aran, e a coma objectiu dar ua importanta projeccion toristica enes territòris qu'i formen part (França, Val d'Aran, Nauta Ribagòrça e Ribagòrça aragonesa). 

Segontes eth President deth Conselh Comarcau dera Nauta Ribagòrça, Josep Lluís Farrero, arténher aguest projècte supausarie refortilhar era integracion economica e sociau en aguestes comarques e, ath delà, ajudarie ara desestacionalizacion deth torisme de montanha gràcies ath gran reconeishement internacionau deth Camin de Santiago. 

I a anotacions istoriques que mèrquen era Val d'Aran coma pas alternatiu des pelegrins que venguien de de Saint Bertrand de Comminges, procedents de Narbonne o Tolouse. Aguest camin s'utilizèc, sustot, a finaus dera Edat Mieja, quan eth pas de Somport se vedec afectat pes guèrres religioses entre hugonetes e catolics. En mapa francés de 1648 se mòstre eth pas de Saint Bertrand de Comminges en Vielha en direccion Barbastro coma via existenta.

En aguesta prumèra amassada, convocada peth president deth Conselh Comarcau dera Nauta Ribagorça, Josep Lluís Farrero, assistiren eth Sindic d’Aran, Carlos Barrera, acompanhat deth Conselhèr de Territòri, José Antonio Boya; era Presidenta dera Comarca dera Ribagorza, Lourdes Pena;eth president dera Communanté de Communes Pyrénnés Haut Garonnaises, Alain Castel, atau coma d'auti bailes e representants des municipis implicadi.

Eth Sindic, Carlos Barrera, auancèc qu'era pròplèu amassada aurà lòc eth 14 de junh, a on se prepausarà un huelheton informatiu d'aguest tram deth Camin de Santiago, acompanhat d'un qüestionari qu'arresponeràn es pelegrins entà milhorar eth servici. 

Se contemple tanben abilitar ua parada de transpòrt public ena boca nòrd deth Tunèl de Vielha e era creacion d'un grop de trebalh entà hèr un seguiment globau deth projècte. 

Enes pròplèus amassades damb era rèsta de territòris implicats se concretaràn es possibles linhes de finançament e eth nòm dera rota.

En tractar-se d'un projècte transfronterèr se contemplen possibles linhes de trabalh coma eth programa de cooperacion territoriau transfronterèr INTERREG a trauès des hons europèus FEDER, atau coma cercar aliances damb es Deputacions d’Òsca e Lhèida e era Agéncia Catalana de Torisme.

IMATGES: CONSELH GENERAU D'ARAN