Resum dera Quilha deth Haro de Les

Eth pòble de Les a celebrat era hestivitat de Sant Pere damb era tradicionau Quilha deth Haro. Ua tradicion millenària que consistís en lheuar en centre dera Plaça deth Haro eth tronc que serà cremat er an que ven pendent era net de Sant Joan. Aguest arbe se baishèc dera montanha eth passat mes de mai pendent era celebracion dera Shasclada deth Haro. Pendent era Quilha deth Haro, a on intervien bona part des vesins deth pòble, s’a lheuat eth tronc pòc a pòc enquia deishar-lo totauments dret. Era climatologia non a acompanhat guaire, pr’amor que non a deishat de plòir pendent era actiuetat, mès açò non a empedit qu’era gent s’apropèsse a gaudir d’aguesta hèsta.

Un viatge qu’er arbe s’a plaçat, diuèrsi joeni se i an en·hilat, an baishat es còrdes que sostiegen eth tronc e coma mane era tradicion, se i an dipositat diuèrsi rams de flors des darrères parelhes que s’an maridat en pòble, coma simbèu de fertilitat e boni auguris. Era Quilha deth Haro a estat eth darrèr acte d’enguan des hèstes deth huec en país, e tornaràn damb era Shasclada deth Haro deth pròplèu mes de mai, quan se baisharà deth bòsc er arbe que substituirà er actuau en centre dera plaça entà Sant Pere.