Resum dera 24au Corsa Aran Per Sa Lengua

Pendent aguest dimenge era Val d’Aran a tornat a viuer ua naua edicion dera Corsa Aran Per Sa Lengua, era hèsta que reivindique er emplec der aranés coma un des elements diferenciaus dera identitat aranesa. Enguan aguesta hèsta ja a celebrat era 24au edicion. Entà meddia començauen es rotes longues, des de Montgarri, Les e eth Pòrt de Vielha en tot demorar ua jornada longa mès damb un gran motiu per endeuant. Ath long deth camin, se trauessauen es bòsqui e camins de montanha deth país, en tot pasar pes diuèrsi pòbles. En çò que tanh ath cortègi que gessie des de Montgarri, se trauessaue peth Plan de Beret en tot cercar Bagergue e Unha, a on se hège ua arturada entà dinar. Dempús, descens per Gessa e Arties, en tot cercar arribar tath tor des 8 deth vèspe deuant dera Plaça dera Glèisa, a on demorauen es cortègis arribadi deth Baish Aran e deth Pòrt de Vielha.

Ena plaça, parlaments de Lengua Viua coma organizadora der eveniment, e prèmi ath dessenh dera samarreta e prèmi Lengua Viua, qu’enguan a estat autrejat a Aran TV pes lèu 6 ans que pòrten en foncionament en tot apropar era informaciond era Val d’Aran, en tot hè’c en aranés.

Coma tostemp, eth grop Nadau barrèc era jornada damb un gran repertòri de musiques en occità e en aranés, en tot hèr cantar e barar a tota era gent amassada ena plaça. Era milhor manera de finalizar ua hèsta tanplan importanta e qu’artenh era participacion de fòrça gent deth país coma de dehòra.