Prumèr dia sense classes entar alumnat dera Val d'Aran

Silenci ensordecedor en prumèr dia en qu’es centres educatius dera Val d’Aran son barradi dempús dera orde per part dera Generalitat de Catalonha en tot sajar de contier era propagacion deth coronavirus.

Lèu mil escolans d’infantil, primària e segondària demoraràn sense classes pendent, au mens, dues setmanes. Ua notícia qu’a estat ben arrecebuda en departament de direccion der Institut d’Aran.

Peth moment, non se harà cap de classe telematica, pr’amor que non ei garantit que totes es familhes dispòsen d’Internet e d’aparelhs electronics entà hè’c.

En Institut d’Aran se darà especiau atencion ar escolanat de dusau de Bachilierat, entà resòlver dubtes e hèr un seguiment, pr’amor des pròves PAU, as que se presentaràn fòrça d’eri.

Ath delà, demoraràn suspenudes totes aqueres classes deth Centre de Tecnificacion en Aran.