Prumèr dia de barrament des termières damb França ena Val d'Aran

Era Val d’Aran se trape en tot víuer eth prumèr dia de barrement des termières damb França. D’aguesta forma, des des 00 ores d’aguest dimars 17 de març, es fòrces de seguretat der Estat, en tot seguir es ordes deth Ministèri d’Interior, se trapen en tot restringir eth pas enes termières. Quauquarren que non passaue des des atemptats de Paris. 

Ua mesura qu’era Val d’Aran hè dies que demanaue.

Era Val d’Aran, e mès concretaments eth Baish Aran, a viscut aguesti darrèri dies episòdis estonants, a on se formauen longues coes enes estancs, e a on a viatges ère complicat de mantier era distància de seguretat entre es persones.

Atau, eth govèrn der Estat a acordat restablir es contraròtles enes termières terrèstres. Sonque se permet er accès en Estat espanhòu as ciutadans espanhòus, as residents en Espanha, as trabalhadors transtermièrs e a qui acredite causes de fòrça major. Ath delà, eth transpòrt de productes no demorarà pas afectat. 

Damb eth lèma "Jo demori en casa", era societat aranesa n’ei conscienta dera grana responsabilitat qu’auem cada un de nosati, pr’amor que sabem qu’aguestes imatges des pòbles uedi, demoraràn en rebrembe lèu.