Projeccion dera pellicula “CompartirXAprendre”, sus era experiéncia deth darrèr laueg deth Tuc dera Lança

Era Sala Era Audiovisuau de Vielha acuelherà era projeccion dera pellicula e posterior debat sus era experiéncia, en prumèra persona, deth laueg deth passat 6 de hereuèr en Tuc dera Lança qu'afectèc a tres esquiaires.

Era presentacion, organizada peth Centre de Lauegi deth Conselh Generau d’Aran, serà aguest dijaus 21 de hereuèr tàs 19.30 ores e compdarà damb una introduccion damb era analisi dera situacion de perilh de lauegi, e sus era experiéncia des accidentadi explicada en prumèra persona damb entrevistes e reflexions sus er accident.

Entad açò, er acte compdarà damb era preséncia de membres deth Centre de Lauegi deth Conselh Generau d’Aran qu'analisèren eth laueg e de Roger Martorell e Aleix Oliveiras, ath delà des imatges captades des de tres camèras.

Era entrada ei gratuïta e era presentacion va dirigida tant a professionaus coma ath public en generau que desire apréner coma evitar e actuar en cas de lauegi.

HÒNT: CONSELH GENERAU D'ARAN