Prevencion deuant eth Coronavirus: Baqueira/Beret barre en tot finalizar era sason

Es mesures de prevencion contra eth coronavirus dejà s’an crubat ua auta victima ena Val d’Aran: Baqueira/Beret aurà de barrar es sues pòrtes a compdar de deman, en tot finalizar ja aguesta sason d’iuèrn. 

Ua decision que se pren dempús de qu’era estacion aranesa s’amassèsse damb eth Govèrn d’Aran e damb es autoritats sanitàries. Ath delà, era Generalitat de Catalonha a decretat tanben aguesta tarde eth barrament de totes es estacions d’esquí. 

Es sòs des forfets de dia e de setmana dejà venudi de forma anticipada seràn retornadi enes pròplèus dies. 

Dies critics a on se demoraràn es efèctes d’aguestes drastiques mesures. En aguest sens, cau arrebrembar que Madrid ei dejà eth foguièr principau de propagacion deth coranavirus en Estat Espanhòu, e precisiament eth mercat de Madrid ei eth mès popular entara estacion d’esquí aranesa. 

Damb aguesta mesura, Baqueira/Beret perderà eth mes de març e era tan avalorada Setmana Santa, per çò qu’era pèrta economica serà significanta. E non sonque tara estacion, senon tà tot eth sector toristic e de servicis dera Val d’Aran.