Presentacion deth Plan d'Igualtat deth Conselh e acte "Hemnes de Nautada" tà celebrar eth Dia dera Hemna

Pendent eth dia d’ager se celebrèren un seguit d’actes en Vielha entà celebrar eth Dia Internacionau dera Hemna Trebalhadora. En prumèr lòc, era Conselhèra de Salut e Benéster, Anna Díaz, liegec eth manifèst institucionau en un acte qu’acuelhec a desenes de persones ena Plaça deth Conselh Generau d’Aran.

Ara seguida, auec lòc en Conselh era presentacion deth nau Plan d’Igualtat deth Govèrn d’Aran, que a a veir damb eth desvolopament dera Lei d’Igualtat Efectiua d’Hemnes e Òmes. Aguesta lei, que remasse un totau de 67 articles, obligue a totes es administracions locaus e empreses que supèren es 250 trebalhadors en Aran a activar eth Plan d’Igualtat, qu’a coma principau objectiu era non discriminacion per motiu de sèxe atau coma era conciliacion laborau e familiar.

Pera tarde, auec lòc er acte “Hemnes de Nautada: Experiéncies ena Val d'Aran”, organizat per Ajuntament de Vielha e Mijaran e era UGT Tèrres de Lhèida. Ei eth prumèr còp qu’eth sindicat celèbre un acte d’aguesta importància ena Val d’Aran. Aguesta accion comencèc damb era projeccion d’un documentau que remasse es experiéncies de quauques hemnes de  nauta montanha e contunhèc damb ua taula redona formada per Angelina Casas, Luisa Pedarrós, Marta Pàmies, Julia Pérez e Amparo Serrano, que compartiren es sues vivéncies coma hemnes trebalhadores ena Val d’Aran.

Tot e que eth dia dera hemna ja a passat, encara quede un acte plan important entara sua commemoracion: era quatau edicion dera Corsa dera Hemna. Aguesta quatau edicion dera Corsa dera Hemna aurà lòc eth pròplèu dimenge, 12 de març, tas 11 deth maitin ena plaça deth Conselh. Es inscripcions encara se trapen dubertes entà toti aqueri que se volguen somar ad aguest acte de reconeishença ath papèr des hemnes.