Petita descenuda d'un 3% d'ocupacion enes mesi de junhsèga e agost
Era descenuda s'a notat sustot en torisme francés que non a vengut tant entath territòri en aguesta epòca
Era Val d’Aran a tornat a réber un gran nombre de visitaires pendent tot er ostieuasustot ena sua epòca mès nauta qu’ei des de mejans deth mes de junhsèga enquia aguestes darrères setmanes d’agost.
En linhes generaus era tendéncia ei bona mès s’a detectat ua descenuda d’un 3% generalizat pendent es mesi de junhsèga e agost. Des dera conselheria de torisme deth pròpri govèrn d’Aran afirmen qu'estudiaràn quin ei eth motiu concrèt d’aguesta descenuda mès expliquen en ua prumèra ipotèsi qu'es viatgèrs comencen a cambiar es sòns destins de viatge e era montanha non ei tant priorizada coma ère pendent es mesi e ans posteriors ara crisi sanitària deth coronavirus.
Totun, e segontes donades oficiaus, era tresau e quatau setmana d’agost en territòri a fòrça estat bona, sustot aguesta darrèra qu’a aumentat un 10% era ocupacion en tot passar d’un 72,6 a un 82,6% d’ocupacion mieja.
Un indicador que preocupe ei era descenuda deth torisme francés.
Era Val viu es sòns darrèri moments de sason nauta toristica en ostieu que s’alongarà enquiara Diada eth dia 11 de seteme.
