Nòta informatiua sus eth Convèni de delegacion de competéncies de gestion forestau en favor deth Conselh Generau d'Aran, per part des Ajuntaments e Entitats Menors Descentralizades dera Val d'Aran

Un des rèptes de futur qu'a eth territòri deuant deth cambiament climatic, amassa damb es nautes temperatures que viuem, ei orientar es politiques sus era gestion forestau entà encaminar-les de cap a ua economia verda que genère naues oportunitats entara zòna e mos ajude a extrèir biomassa e husta d'ua forma logica e sostenibla, entà crear un autoconsum que permete un profitament autant en equipaments publics e installacions particulares, atau coma poder desvolopar ua industria entara transformacion dera husta. Ei per açò qu'eth Conselh Generau d'Aran impulse aguest projècte de gestion forestau e bioeconomía damb eth que Vielha e Mijaran ei tanben comprometut. 


Aguesti motius amien a dessenhar un convèni que preten gestionar ua silvicultura actiua e de manèra globau entà ajudar a protegir eth medi ambient en tot balhar forma ath nòste païsatge e en tot garantir ingrèssi economics entara mantenença des montanhes, camins e es sues pistes forestaus.

Totes e cadua des entitats locaus son proprietàries des sòns bòsqui e aguest convèni crearà un marc unic de gestion entà tot eth territòri a trauès d'ua comission forestau damb representacion de cada entitat locau que participe entà acordar per consensus era presa de decisions e establir es linhes generaus d'ua manèra coordinada e coerenta, que permete era reinversion des recorsi economics generadi per aguesta gestion, enes pròpris bòsqui, mantenença de pistes e camins e utilizacion dera biomassa extrèta entà cauhar equipaments publics, coma er Espitau Val d'Aran, es centres educatius e esportius e d'autes installacions, en tot provocar atau un estauviament energetic e economic considerable. Quauquarren qu'en territòris vesins ja hè decènnis que realizen.


HÒNT: AJUNTAMENT VIELHA E MIJARAN