Neoelectra e Carbonero, plaçades en Les, presenten un ERE d'escandilhament

Segontes an informat era agéncia ACN e Diari Segre, era plantilha de Neolectra e Carboneco refuse er expedient d'escandilhament d'ocupacion anonciat pera direccion en Les e urgís alternatives entà mantier era industria energetica. Atau ac expliquèc ager eth secretari generau d'UGT-FICA de Lhèida, Xavier Perelló, dempús d'amassar-se damb es trabalhadors e tanben damb eth baile dera localitat, Andreu Cortés, e deféner qu'era enterpresa a de revertir es sòns plans. Perelló, que preve amassar-se en brèu damb era sindica d'Aran, Maria Vergés, urgís ua amassada damb era direccion dera enterpresa entà qu'explique es arrasons que, ena sua opinion, expliquen eth barrament dera activitat ena Val d'Aran, en tot auer en compde qu'era companhia a un totau de 18 plantes en Estat. Expliquèc que peth moment sonque an era comunicacion verbau der anonci deth ERO d'escandilhament que hec era companhia as trabalhadors eth darrèr diuendres.

Defenec qu'era planta a viabilitat en tot aplicar mesures, coma poderie èster ajustar era produccion. Segontes apuntèc, era enterpresa adusís problèmes de còsti, mès eth sindicat e es trabalhadors reclamen ua memòria economica e explicacions dera direccion. En aguest sens, vòlen convertir eth ERO d'escandilhament en un expedient de regulacion temporau d'ocupacion, mesura que darie temps entà negociar e poder analisar possibles alternatives que podessen garantir era viabilitat deth negòci energetic. Neoelectra genère electricitat en tot utilizar gas qu'arrecep, segontes es hònts, a trauès de cubes procedentes deth pòrt de Tarragona. Dempús, Carboneco recupère emissions e genère gas carbonic que comercialize posterioraments entara elaboracion de bevendes gaseoses. Eth plan dera direccion deth grop non includís Caviar Nacarii.



HÒNT: NEOELECTRA