Naut Aran impulse era viuenda entà trabalhadors de temporada
23/11/2023
Er equip de govèrn der Ajuntament de Naut Aran entestat per César Ruiz-Canela a prepausat qu’eth consistòri sigue propietari d’un terren de 1800 mètres quarrats a on se poderien bastir un totau de 60 pisi de 30 mètres quarrats e que poderien supausar viuenda de loguèr entàs trabalhadors de temporada enes sasons d’iuèrn o ostieu sustot, qu’ei quan i a ua maxima afluéncia de professionaus en Aran.
Era gestion o concession se prepausarie per part d’ua cooperativa entre empresaris de Baqueira e deth Naut Aran.
Laguens d’aguest espaci tanben se contemplarie eth bastiment d’un complèx de 100 mètres quarrats entath grop de Pompièrs e Emergéncies e un magazèm entara brigada municipau.
César Ruiz-Canela destaque que “coneishem era problematica des persones que vien a trabalhar ath nòste municipi e es dificultats entà trapar ua viuenda de loguèr ena que poder residir pendent era sason d'iuèrn sustot, mès tanben entath ostieu. Aguesta accion a coma objectiu acabar damb aguesta situacion”.
HÒNT: AJUNTAMENT NAUT ARAN
HÒNT: AJUNTAMENT NAUT ARAN
Manu Moga