Naut Aran impulse era creacion d'abitatge sociau en municipi

Eth prètz deth loguèr der abitatge ena Val d’Aran contunhe en tot èster un gran obstacle entàs trabalhadors que vien tath país e tàs joeni que vòlen emancipar-se. 

Ua problematica que è temps que se debat enes disparièrs consistòris aranesi.

En aguest sens, eth darrèr Plen celebrat en Ajuntament de Naut Aran a aprovat de manèra iniciau ua prepausa de modificacion de nòrmes subsidiàries de locaus e abitatges en municipi. 

Era prepausa, aprovada damb es vòts a favor deth grop de Convergéncia Aranesa e Aran Amassa, e damb era negativa d'Unitat d’Aran, aurà d’èster acceptada pera Comission d'Urbanisme dera Val d'Aran.

Ara seguida, eth Consistòri deth Naut Aran aurie d’ellaborar ua ordenança.

Quauquarren que se poirie aplicar en quinsevolh poblacion deth Naut Aran mèns enes nuclèus agregats de Baqueira e Tanau.