Nau centre entara joenessa en Vielha

Gràcies ara modificacion de crèdit aprovada en darrèr Plen der Ajuntament de Vielha e Mijaran, eth consistòri poderà invertir 30.000 euròs ena creacion d’un espaci en quau s’organizaràn activitats ludiques, formatives, esportiues e artistiques tà mainatges de 10 a 15 ans.

Eth centre de joenessa compdarà damb personau titolat entà desvolopar es diferentes activitats, que cerquen afavorir eth creishement e desvolopament integrau des joeni qu’i participen.

Damb aguest espaci, segontes explique eth còsso de joenessa e espòrts der Ajuntament, Alberto López, se vò “aufrir un lòc a on es nòsti joeni se poguen amassar dempús de classes en un ambient controlat e positiu”.

Aguest centre se plaçarà en antic aucider e era prevision ei qu’enguan se realize ua prumèra fasa entà abilitar era planta baisha der edifici, entà dotar-la de banhs e cauhatge, e mès endeuant s’abilitarà era part superior.

S’a previst començar es òbres enes pròplèus setmanes entà poder méter en foncionament eth centre a finaus d’an. Eth Baile de Vielha e Mijaran, Juan Antonio Serrano, a manifestat era sua satisfaccion damb aguest nau projècte: “era creacion d’un centre entàs nòsti joeni siguec un des compromís que prenérem pendent era campanha electorau e èm fòrça satisfèts de poder amiar-lo a tèrme”.