Mòrt accidentau d'ua menor de un an en Arties
Suposadament aurie mòrt pr'amor d'un infortuni damb un veïcul que l'a atropelhat
Aguest maitin ath torn de 10.30 ores, era sala de contròl d’Aran a recebut un avís mejançant eth telefòn 112 a on s’informaue d’ua emergéncia a on i auie ua menor implicat. Suposadament s’auie produsit un accident per atropelhament ena gessuda d’un parcatge ena part iniciau dera poblacion d’Arties.
Enquiar endret s’i an desplaçat 5 pompièrs en dus veïculs d’ Emergéncies dera Val d’Aran amassa damb ua equipa deth SEM, 1 mètge e 1 infirmièra der Espitau Val d’Aran e un elicoptèr.
Es Mòssos d’Esquadra s’an desplaçat enquia Arties, a on s’a talhat era circulacion enes dus sens dera cauçada dera C-28, un hèt qu’a produsit retencions en toti dus costats.
Eth personau sanitari a determinat que patie ua emorràgia e an constatat qu’entraue en arturada cardiaca, s’a verificat qu’es lesions que presentaue èren incompatibles damb era vida.
Eth Conselh Generau d’Aran e eth còs de Pompièrs d’Aran e era equipa de Aran Salut hèn arribar es sues condolences ara familha e amics. Des der Ajuntament de Naut Aran tanben s’a lamentat era pèrta dera menor e a aufrit es sues condolences.
