Mès de 200 persones ena Caminada còntra eth Càncer de Popa

Un an mès, era junta locau dera Associacion Espanhòla Còntra eth Càncer dera Val d’Aran a celebrat era sua tradicionau Caminada còntra eth càncer de popa, en tot commemorar eth Dia Mondiau d’aguesta malautia, qu’auec lòc eth 19 d’octubre.

Dimenge, 22 d’octubre, tàs 12 deth meddia, mès de 200 persones, de totes es edats e condicions, gessien dera plaça dera Glèisa en tot realizar un recorregut a pè per Vielha. Totes eres damb un madeish objectiu: era solidaritat e era luta còntra eth càncer.

Ua caminada qu’era associacion portaue dejà mès d’un mes organizant e ena quau an agut, coma tostemp, fòrça participacion ciutadana.

En aguest dia, ei fòrça important rebrembar qu’era prevencion e un estil de vida saludable son agents a auer en compde tostemp que parlam d’aguesta malautia.

Un an mès, es aranesi an tornat a demostrar eth sòn compromís damb era luta còntra eth càncer. Mès de dus centenats de persones que s’an somat ath ròsa e an collaborat damb era investigacion entà, bèth dia, poder eradicar deth tot aguesta malautia.