Luis Carlos Medina, nau secretari generau de Convergéncia Democratica Aranesa

Luis Carlos Medina ei a compdar d'aguest 30 de març eth nau Secretari Generau de Convergéncia Democratica Aranesa-Partit Nacionaliste Aranés. Aguesta ei era decision qu'a prenut eth partit pendent eth darrèr Comitè Executiu Nacionau celebrat peth partit. Medina pren eth relèu d'Àlex Moga, qu'a decidit deishar eth cargue dempús de dètz ans coma mesura de transicion en partit enquiara celebracion deth pròplèu Congrès Nacionau qu'aurà lòc en mes de mai. Moga dejà auie comunicat pendent eth passat mes de seteme era sua non intencion de presentar-se ara reeleccion coma secretari generau de CDA-PNA. Segontes Moga "damb aguesta decision poderam hèr ua veritabla refondacion e creacion deth nau espaci politic" en tot pensar de cara as següentes eleccions municipaus e ath Conselh Generau d'Aran. "Eth partit ac a de besonh e eth país se n'a de veir beneficiat", higís Moga. 

Luis Carlos Medina ei actuauments vicesindic prumèr en Conselh Generau d'Aran, e conselhèr d'administracion publica, finances e coneishement e transparéncia, atau coma conselhèr d'espòrts. 

D'aute biais, Àlex Moga, a assegurat que mantierà eth sòn cargue coma còsso en ajuntament de Vielha, a on ei, ath delà, eth portavotz municipau de CDA-PNA.


IMATGE: CDA-PNA