Jose Albizu e Sandra Jordà, guanhadors dera 12au Pedals de Foc Non Stop

Un an mès era Val d’Aran a estat era grana protagonista dera 12au Pedals de Foc Non Stop. Era corsa de BTT per excellència de tot er Estat e cada viatge damb mès importància a nivèu internacionau, pr’amor qu’enguan supausaue eth 1èr Campionat d’Euròpa de MTB Ultramarathon. Er 1 de junhsèga, entàs 5 deth maitin, coma dejà ei de costum, s’amièc a tèrme era gessuda oficiau en Vielha. Lòc de gessuda e d’arribada dera pròva. Lèu 700 participaires iniciauen ua jornada tanplan dura, damb un totau de 213 kms, e 6200 mètres de desnivèu positiu, en tot crotzar es comarques vesies der Alta Ribagorça, eth Pallars Jussà e eth Pallars Sobirà abantes de tornar entath país. Peth camin auien de trauessar diuèrsi pòrts: Eth Còth de Serreres, eth Còth de Peranea, eth Còth de Triador e eth Còth de Portella Blanca entre d’auti. Ua pròva sonque entà valenti, e qu’enguan a agut ua climatologia cambiant qu’a dificultat mès eth recorregut.

Joseba Albizu, a estat eth guanhador d’aguesta 12au Pedals de Foc Non Stop, damb un temps de 10 ores 18 menutes e 18 segons. Ua victòria importanta e coma comente Albizu a estat tanplan dificila d’obtier.

Albizu, ath delà, ei eth 1èr campion d’Euròpa d’aguesta especialitat. Un merit eth quau encara a d’assimilar.

Ena categoria femenina era guanhadora e 1èra Campiona d’Euròpa dera especialitat ei era catalana Sandra Jordà, qu’a arribat damb un temps de 13 ores 33 menutes e 25 segons. En pòdi l’an acompanhat es tanben catalanes Ramona Gabriel e Janette Solsona.

En generau a estat ua grana jornada esportiua, ena qu’era Val d’Aran s’a tornat a méter en mapa internacionau damb ua pròva ciclista qu’a compdar d’enguan tanben hè part deth circuit internacionau, e qu’a compdat damb lèu 700 valents qu’ac an dat tot per arribar ena meta, en tot híger era climatologia advèrsa qu’a hèt mès epica era corsa.