Grana acuelhuda dera campanha de remassada de joguets “Un joguet, ua illusion” organizada per Unitat d’Aran

 

UA, qu’auie amiat a tèrme d’autes campanhes solidàries ans endarrèr, reprén enguan era sua activitat deuant dera situacion sociau e economica derivada dera crisis sanitària dera COVID-19, e a coma objectiu principau balhar supòrt ad aqueres familhes que mès en patissen es conseqüéncies.

 

Pendent era campanha s’an remassat mès de dus cents-cinquanta jòcs e tota sòrta de joguets, libres, e disparièr materiau escolar, qu’an estat despartidi entre un totau de quaranta mainatges e mainades. En aguest sens, Marc Tarrau, secretari d’organizacion d’UA manifestaue que, “èm fòrça contenti e satisfèts per aguesti resultats. Demòstre era grana solidaritat e altruisme qu’a era societat aranesa”. E higie que, “volem dar es gràcies a totes aqueres persones e familhes qu’an volut aportar eth sòn gran de sable ad aguesta iniciativa, en tot hèr-mos a arribar materiau tà familhes e mainatges qu’ac an mès de besonh”.

 

Atau madeish, toti aqueri joguets que non s’an podut despartir pr'amor dera grana quantitat de joguets remassats, seràn cedidi ara associacion Caritas a trauès dera sua enterpresa d'insercion sociolaborau Troballes, entà poder-les hèr a arribar a d’autes familhes qu’ac an de besonh.


HÒNT: UNITAT D'ARAN