Gran èxit dera prumèra corsa infantil Kids&Fun Spring Race

Dimenge 4 de junh auec lòc era prumèra corsa infantil Kids & Fun Spring Race, organizada peth centre educatiu Kids & Fun damb era collaboracion der Ajuntament de Vielha e Mijaran.

Era corsa estaue dubèrta a toti es mainatges e mainades neishuts entre es ans 2005 e 2011, ei a díder, d’entre es 6 e 12 ans e, maugrat era ploja e eth mau temps, siguec tot un èxit de participacion.

Era inscripcion estaue dubèrta enquiath madeish dimenge e eth prètz ère de sonque 2 euròs e un joguet, que toti es corredors e corredores auien de portar entà poder participar. Eth centre Kids & Fun donarà era totalitat de joguets remassats as mainatges mès necessitats.

Era competicion compdaue damb tres recorreguts per Vielha diferents segontes era categoria: es pre-benjamins auien de recórrer 500 mètres, mentre qu’es benjamins 1 quilomètre e es arlequins 2.

Dempús dera entrega de prèmis i auie organizat un sorteig de tot tipe de materiaus, des de ròba e joguets, enquia sopars o dinars, tot donat per diferents botigues e restaurants deth municipi. S’organizèc tanben un vermut entàs petits participants e es sòns pairs, entà acabar de gaudir d’un matin esportiu e fòrça divertit.

Ua gran iniciatiua de Kids & Fun, qu’en sòn prumèr an de foncionament dejà dèishe clar era grana qualitat e ganes d’hèr des professionaus qu’i trebalhen.