Fòrça activitats ena 11 edicion des Jornades Micologiques

Pendent es dies 21 e 24 de seteme, era Val d’Aran acuelhec era edicion numerò 11 des sues tradicionaus Jornades Micologiques, qu’enguan an agut lòc en cap-lòc aranés. Un eveniment qu’a estat organizat peth Conselh Generau d’Aran amassa damb era Societat Catalana de Micologia e Torisme Val d’Aran.

Un totau de quate dies enes quaus se realizèren activitats fòrça variades, des de gessudes de camp dubèrtes a toti es interessats a explicacions sus es misharnons en quauqui estudis d’educacion primària deth territòri. Era activitat siguec molt ben acuelhuda pes petits, qu’escotèren damb atencion tota era informacion e s’interessèren pes exemplars de misharnons que pòden trapar ena Val d’Aran.

Ath delà d’açò, i auec tanben ua exposicion de misharnons formada pes pèces prèviament remassades pes micòlegs e aficionats enes gessudes de camp.

Tot e qu’era tardor dejà ei arribada, des dera Societat Catalana de Micologia afirmauen qu’era tempsada de misharnons sonque a hèt que començar, e que mos cau estar atents ara meteorologia e ar heired, pr'amor que poderien non acompanhar.

Desenes de persones, tant araneses coma vengudes d’autes parts de Catalonha, an participat en aguestes Jornades, qu’enguan an agut ua participacion mès nauta qu’ena passada edicion. Ua mòstra de qu’es misharnons son un atractiu mès d’Aran, atau coma ua forma d’apropar-mos mès ara natura.