Eth Val d'Aran Montcorbison guanhe era Liga Catalana de Curling
Eth curling aranés a somat ua naua victòria ena Liga Catalana quauques setmanes dempús d’auer pujat ara maxima categoria estatau.
Pendent es dies 6 e 7 de mai se celebrèc era cincau jornada dera edicion numerò 12 dera Liga Catalana de Curling ena pista de gèu deth Club Poliesportiu Puigercerdà. Damb aguesta edicion, era Liga Catalana a batut eth rècord de participacion des sòns darrèri ans, damb un totau de catorze equipes inscrites.
Era equipa Val d’Aran Montcorbison, formada per Héctor Manero, Adrián Manero, Jesus Manero e Marc Barés, se proclamèc campiona dempús de guanhar còntra Barcelona Navarro, equipa damb era qu’anaue empatada dempús de qu’ambdues auessen guanhat es cinc partits anteriors.
Tant Val d’Aran Montcorbison coma Barcelona Navarro acabèren era competicion damb un totau de 22 punts, quedant prumèr e dusau, respectivaments, e seguidi en pòdium peth Puigcerdà Pànxing Masters, damb 20 punts.
Era auta equipa aranesa qu’i participèc, Val d’Aran Garona quedèc ena posicion numerò 9 damb un totau de 9 punts.
En tot finalizar aguest campionat, es equipes gaudiren deth dinar de barrament dera Liga e, acte seguit, dera entrega de prèmis.
Per ara, Val d’Aran Montcorbison, amassa damb Barcelona Navarro e Puigcerdà Pànxing Masters, an era oportunitat de jogar ena Liga Espanha es pròplèus 20 e 21 de mai.
IMATGES: FACEBOOK CLUB CURLING VAL D'ARAN
