Eth servici de transpòrt public transfronterèr comence eth 18 d'abriu
Eth prètz totau d'aguest servici non superarà es 3'30 euròs
Pendent era celebracion deth darrrèr acte commemoratiu deth Tractat de Lies e Patzeries entre Comminges e era Val d’Aran s’aprofitèc entà presentar eth nau projècte de transpòrt public transfronterèr.
Aguest nau servici entrarà en vigor eth pròplèu dimars 18 d’abriu, un còp passada era Setmana Santa, e peth moment sonque foncionarà de deluns a diuendres.
Aguest servici connècte es tradicionaus linhes de transpòrt intèrn aranesa e francesa e permet arribar des de Baqueira enquiara estacion de tren de Saint Gaudens damb un unic canvi d'autobús e hènt parada en toti es pòbles. Er objectiu de parar ena estacion de tren deth pòble de Saint Gaudens ei poder arribar tanben a Tolosa en un trajècte d'apuprètz tres ores.
Er objectiu d’aguest servici de transpòrt public non ei sonque toristic, senon que tanben s’a agut en compde as escolars aranesi e francesi qu’estúdien en aute país.
Eth prètz des dus bilhets necessaris entà gaudir d’aguest trajècte serà d’1'10 euròs peth tram entre Baqueira e Les e de 2'20 euròs peth tram entre Les e Saint Gaudens.
Eth deth transpòrt public ei sonque un des acòrds as qu’era Val d’Aran demore arribar damb Comminges, ja que s’està trebalhant tanben en d’auti projèctes coma eth deth Camin de Sant Jaime que recor des de Sant Bertran enquia era Ribagòrça Orientau aragonesa, en tot passar per Comenge, Val d’Aran e Nauta Ribagòrça.