Eth risc de rebròt e es naui contagis, ara baisha ena Val d'Aran

Dempús d’uns dies pintada de vermelh fòrt, era Val d’Aran comence a clarejar eth sòn color en mapa interactiu dera Covid-19. Eth risc de rebròt en parçan a queigut en un 50% respècte a ua setmana endarrèr, en tot passar des 3.000 punts as 1.500 actuaus. 

Es naui contagis detectadi dia a dia van tanben ara baisha. Aué, se n’an notificadi 7 de naui, quan pendent era setmana passada çò d’abituau ère qu’es casi detectadi en un dia superèssen era detzea. 

Çò que preocupe, totun, ei eth nombre d’ingrèssi en Aran. Damb ua poblacion de 10.000 persones, actuauments i a 13 ingressadi ena planta COVID-19 der Espitau Val d’Aran, que compde damb un totau de 28 lhets. 

Segontes informe eth Departament de Salut dera Generalitat de Catalonha, ara s’investigue s’era varianta britanica deth Coronavirus poirie èster ath darrèr d’aguesta situacion epidemiologica qu’era Val d’Aran viu d’ençà passat eth Nadau.