Eth pròplèu 30 de Junhsèga se celèbre era 24au Corsa Aran Per Sa Lengua
Un an mès, era hèsta reivindicatiua dera lengua aranesa amassarà a centenats de gents de tot eth territòri
Eth pròpleu dimenge 30 de junhsèga aurà lòc ua naua edicion dera Corsa Aran per Sa Lengua, era hèsta que reivindique er emplec der aranés. Enguan, aguesta hèsta dejà artenh era 24au edicion, e coma tostemp se demore que i age ua anauta preséncia de participaires ath long dera jornada.
Coma dejà ei abituau, pendent aguesta jornada s’amien a tèrme desparières gessudes a pè a compdar de diuèrsi indrets deth país. Atau, i auràn gessudes entà meddia en Montgarri, Les e eth Pòrt de Vielha. A mesura que s’auance en camin, s’i higen participaires en d’auti lòcs de pas. Era hèsta finalize ena Plaça dera Glèisa de Vielha, a on s’amassen es desparières cortègis abantes de presenciar eth concèrt deth grop Nadau.
Cau remercar qu’era venda de samarretes oficiau dera corsa dejà ei en foncionament, e se poderàn crompar enquiath pròplèu 29 de junhsèga enes cobèrts der Ajuntament de Vielha e eth madeish dia dera Corsa, ena plaça dera Glèisa. Ath delà, tanben i aurà punts de venda en Salardú aguest dimèrcles e en Bossòst pendent era jornada de dijaus.