Eth pròplèu 23 d'octobre comence era campanha de vacunacion contra era gripa

Era Agéncia de Salut Publica de Catalonha comence aguest pròplèu 23 d'octobre era campanha 2017-18 de vacunacion contra era gripa. Er objectiu ei, fonamentauments, esvitar es complicacions d'aguesta malautia enes persones damb problèmes de salut cronics, edat auançada o d'autes condicions que les hèn, especiauments, susceptibles as sòns efèctes. 

Segontes a manifestat eth secretari de Salut Publica de Catalonha, Joan Guix, "aguesta malautia afècte entre eth 5% e eth 20% dera poblacion". Enguan, des de Catalonha, era campanha se centre ena vacunacion en hemnes embarassades, qu'ei un collectiu damb un risc fòrça anaut. 

Es farmacies participaràn d'ua forma activa, en tot vacunar as grops de risc, atau coma as sòns trebalhadors. En mes d'abriu, ath delà, realizaràn ua enquèsta as usatgèrs entà conéisher eth percentatge de poblacion de risc vacunada, usatgèra deth burèu de farmacia.

Era campanha aurà ua durada, apruprètz, de 2 mesi e es vacunes se traparàn en toti es centres d'atencion primària (CAP) e d'auti centres vacunaus a compdar deth 23 d'octobre. D'aguesta manèra, era proteccion serà optima quan comence era actiuetat gripau que, normauments, ei entre es mesi de deseme e gèr.

Era actiuetat gripau en Catalonha pendent era sason 2016-2017 siguec moderada damb 601 casi grèus confirmadi peth virus dera gripa. Era màger part des casi èren persones non vacunades, entre es quaus i auec 90 mòrts.