Eth plen der Ajuntament de Vielha e Mijaran apròve iniciaument era modificacion des Normes Subsidiàries e Complementàries de Planejament dera Val d’Aran entà installar plaques solars e regular es viuendes compartides

En çò que tanh as plaques solars, era prepausa a gessut endeuant per unanimitat des vòts deth plen, en tot respóner ara nauta demana que i a en municipi de particulars que vòlen hèr us d’aguest sistèma energetic.

Damb aguesta prepausa, non serie permetut plaçar plaques solars en tet, en tot anar distribuïdes en dues hilères (era des lucanes e era des velux), en tot aucupar un maximal deth 45% dera superfícia. Ath delà, se profitarie entà ampliar er espaci des lucanes actuau, d’1 mètro a 1,30 mètros.

D’aute biais, tanben s’a aprovat iniciaument er expedient entà regular es viuendes compartides. En aguest sens, des de 2021 eth consistòri bloquegèc aguesta possibilitat e, ara, damb era naua prepausa, se demane ath proprietari dera viuenda, qu’amplie eth numerò de places de parcatge disponibles d’1 a 2 vinculades ar abitatge. En totau se permeterà un maximal de 4 persones per viuenda damb sojorns maximals de 31 dies. En tot cas, enes viuendes compartides, per definicion, sonque se pòt logar abitacions, non era viuenda complèta, pr’amor qu’eth proprietari a de víuer en madeish abitatge. Aguesta prepausa a compdat damb es vòts a favor deth govèrn d’Unitat d’Aran e eth grop d’Aran-Amassa e era abstencion de Convergéncia Aranesa.

Dempús d’auer-se aprovat iniciaument ambdús ahèrs, auràn de passar pera Comission d’Urbanisme entà que poguen seguir eth sòn cors abituau.

“Er Ajuntament de Vielha e Mijaran met dessús dera taula ua prepausa oficiau entà regular era installacion des plaques solars e era regulacion des viuendes compartides, coma responsa ara nauta demana que i a en nòste territòri”, comente eth baile de Vielha e Mijaran, Juan Antonio Serrano.


HÒNT: AJUNTAMENT VIELHA E MIJARAN