Eth plen der Ajuntament de Vielha e Mijaran apròve era revocacion dera modificacion des taxes previstes entar exercici 2022

Damb aguesta suspension, eth consistòri deisharà de requectar ua carga impositiva importanta a compdar de 2022, en çò que supausarà ua dificultat e un desequilibri importanti a nivèu fiscau, damb era conseqüenta dificultat entà poder amiar a tèrme actuacions importantes en servicis basics, coma ei eth mantenement e melhora deth hilat e des depòsits d’aigua. En aguest sens, s’an realizat granes inversions en subministrament d’aigües mès contunhe pendent actuar en 30% deth hilat municipau entà actualizar-lo, ath delà d’intervier en 11 des 14 depòsits d’aigua existents qu’an mès de 50 ans e presenten damatges estructuraus, pr’amor que non an arrecebut cap inversion des deth sòn bastiment.

A compdar d’ara, serà de besonh daurir un debat entà poder establir ua planificacion a long termini que garantisque un creishement equitatiu de tot eth municipi damb melhores des sòns servicis e un ampliament des madeishi e que permete corbir es besonhs que se poguen generar ena ciutadania.

“Hè mès de 30 ans que non s’a abordat era problematica que genère era manca d’ingrèssi en relacion ath creishement e era aumentacion de servicis municipaus que se presten ara ciutadania, atau coma era adaptacion e melhora d’infraestructures basiques coma eth provediment e canalizacion dera aigua entre d’auti, ei per açò que sometérem aguesta pujada de taxes. Damb aguesta suspension, calerà cercar naues vies de finançament entà poder amiar a tèrme futures inversions enes servicis basics”, manifèste eth baile de Vielha e Mijaran, Juan Antonio Serrano. E ahig que “serà de besonh daurir un debat e cercar ua solucion responsabla que garantisque prosperitat a tot eth municipi e permete un creishement equivalent as besonhs des ciutadans”.


HÒNT: AJUNTAMENT VIELHA E MIJARAN