Eth plen der Ajuntament de Vielha e Mijaran apròve era modificacion des ordenances fiscaus, taxes e prètzi publics entar an 2024

Se poderà finalizar era substitucion des canerades de fibrociment per polietilen qu'encara manque per cambiar (30% en municipi) e i aurà un aument dera aportacion deth consistòri que se destinarà as Entitats Municipaus Descentralizades

I aurà bonificacions deth 30% en IBI entà construccions, installacions e òbres enes que s'incorpòren sistèmes de profitament termic o electric d'energia solara, e, en ICIO, deth 75% entath foment de viuendes de proteccion oficiau e deth 25% entà bastisses plurifamilhars, viuendes unifamilhares e locaus publics

"Es taxes e prètzi publics non an patit cap aument en es darrers 8 ans, de manèra qu'era qualitat des servicis que prèste er Ajuntament de Vielha e Mijaran se resentís e açò mos ac cau evitar. Per aquerò ei de besonh adaptar-les as còsti reaus, en tot patir ua actualizacion generau deth 14,9%”, comente eth baile der Ajuntament de Vielha e Mijaran, Juan Antonio Serrano. E ahig que “ei de besonh aguest increment entà poder amiar a tèrme inversions en projèctes de milhora e manteniment de diuèrsi servicis, coma ei, per exemple, eth des aigües lordes e aumentar era dotacion economica as EMDs”. 



HÒNT: AJUNTAMENT VIELHA E MIJARAN