Eth Plen der Ajuntament de Vielha e Mijaran apròve era 3au modificacion de credit deth pressupòst de 2022, damb eth que se poiràn hèr fòrça projèctes de milhora deth municipi

En aguest sens, s’amiarà a tèrme era pavimentacion deth camin que ges des deth parcatge des antigues casèrnes militares, en tot passar peth deuant dera pista de pàdel, er Institut d’Aran enquia arribar a era mòla de Betren. En aguest projècte tanben s’amiarà a tèrme er enlumenat de tot eth trajècte. En airau energetic, tanben ei previst era substitucion der enlumenat des fanaus enes Avengudes Pas d’Arró e Calbetó Barra, entà favorir era milhora dera eficiéncia energetica publica.

Damb aguesta modificacion de credit tanben se poderà realizar era reforma des patis de primària e infantil dera Escòla Garona, s’apariarà eth cementèri de Vielha, en tot ampliar eth numerò de cavòts disponibles deuant era manca d’espaci actuau, e s’executarà era conversion dera antiga bastissa dera husteria deth Cap dera Vila de Vielha en un equipament ludic-familhar entà poder-i acuélher hèstes e amassades.

En airau esportiu, s’amiarà a tèrme eth skate park ath cant deth Palai d’Espòrts, e se desvoloparàn trabalhs de milhora e mantenement ena pista de fronton e ena de pàdel e se reformarà eth solèr deth Palai d’Espòrts. E se remodelaràn es parcs infantils plaçadi en carrèr Montcorbison e ena Plaça Arnals de Vielha.

Atau madeish, s’a agut d’aumentar eth prètz des subministraments energetics (lum e gas), deuant era pujada des prètzi des matéries primes.

Era modificacion de credit ascendís a 2.877.000€, e a estat aprovada damb es vòts a favor d’Unitat d’Aran, era abstencion de Convergéncia Aranesa e eth vòt en contra d’Aran-Amassa.

D’aute biais, eth plen a aprovat era modificacion dera ordenança fiscau reguladora der impòst sus er increment deth valor des terrens de naturalesa urbana, a arraïtz d’ua senténcia deth Tribunau Constitucionau qu’obligue as consistòris a modificar-la. Ara se mantierà a exposicion publica pendent 30 dies abantes dera sua aprobacion definitiua.

E, fin finau, s’a aprovat ua Declaracion Institucionau sus era guèrra d’Ucraïna presentada per equip de govèrn d’Unitat d’Aran, damb era que se balhe supòrt ath pòble d’Ucraïna deuant dera invasion e conflicte belic per part de Rússia, en tot condemnar aguest atac e méter eth consistòri a disposicion de quinsevolh tipe d’accion que pogue servir entà ajudar ath pòble ucranian.


HÒNT: AJUNTAMENT VIELHA E MIJARAN