AUE TV
    1. AUE TV

    Eth plen der Ajuntament de Vielha e Mijaran apròve era 2au modificacion de credit deth pressupòst d’enguan

    07/06/2023

    Se cambiarà er enlumenat public de tot eth municipi e se milhorarà era eficiéncia energetica deth Palai de Gèu damb plaques solares, gràcies a dues subvencions des hons europèus Next Generation

    Aguest maitin, eth plen der Ajuntament de Vielha e Mijaran a aprovat era 2au modificacion de credit deth pressupòst municipau d’enguan, avalorada en 3.395.771,31€, finançada a trauès deth romanent de tresaureria (1.894.259,46€) e credit extraordinari (1.501.511,85€). Aguesta modificacion a compdat damb es vòts a favor deth govèrn municipau d’Unitat d’Aran, era abstencion de Convergéncia Aranesa e eth vòt en contra d’Aran-Amassa.


    Gràcies a d’aguesta modificacion de credit se poderàn amiar a tèrme desparières accions a nivèu municipau. Per un costat, se procedirà a cambiar er enlumenat public de tot eth municipi, gràcies a ua subvencion d’1.453.015,01€ des hons europèus Next Generation. Damb ua dusau subvencion tanben d’aguesti hons, s’amiarà a tèrme ua milhora dera eficiéncia energetica deth Palai de Gèu, a trauès dera installacion de plaques solares, damb ua quantitat de 327.428,81€.


    Ath delà, tanben se realizarà un seguit d’actuacions municipaus, sustot en airau deth servicis d’aigües e accessibilitat. En aguest sens, se destinaràn 212.545,39€ entà milhorar era accessibilitat e adaptacion des hilats deth servici d’aigua correnta e aigües lordes ena Avenguda Baile Calbetó Barra de Vielha. Tanben se meterà en marcha eth depòsit d’aigua de Casau, en matéria de cloracion e connexion, damb ua partida de 100.000€. Se substituirà era canerada d’aigua de fibrociment per ua de polietilen ena carretèra de Gausac, per un valor de 50.000€, se milhorarà eth hilat d’aigües municipaus en carrèr Còsta de Vilac, per valor de 58.830,24€ e se milhoraràn es trepadèrs en carrèr Clòses de Vielha damb ua partida de 50.000€.


    D’aute biais, tanben se logarà ua escombradora e baldejadora enquia acabar er an per valor de 65.000€.


    Fin finau, tanben s’aumentarà eth salari deth personau der Ajuntament de Vielha e Mijaran que s’establís ena Relacion de Lòcs de Trabalh (RLT) dera Administracion e Foncion Publica.


    “Gràcies a d’aguesta modificacion de credit, enguan e en 2024 e 2025 amiaram a tèrme fòrça actuacions de besonh que milhoraràn es servicis basics de tot eth municipi, en airaus coma eth manteniment deth hilat d’aigües, era eficiéncia energetica publica e deth Palai de Gèu, e era accessibilitat de diuèrsi carrèrs”, comente eth baile de Vielha e Mijaran, Juan Antonio Serrano.
    Manu Moga
    Tornar