Eth Palai de Gèu de Vielha enregistre chifres recòrd d’abonats e usatgèrs​

Fòrça entitats hèn a servir pendent es darrèri ans es installacions deth Palai de Gèu coma sedença des sues activitats dirigides e entrenaments, en tot incrementar era aufèrta esportiua en municipi: Natacion, dança, sambo, escalada, tecnificacion, pre-tecnificacion e naut nivèu d’espòrts de nhèu.

“Eth Palai de Gèu ei un pilar fonamentau der espòrt e dera societat en generau en Vielha e Mijaran e deth conjunt dera Val d’Aran. Ei er unic equipament a on s’i pòt nadar pendent lèu tot er an, e ua des pòques installacions de tota Espanha qu’encara manten era pista de gèu entà poder-i practicar desparières disciplines esportiues. Per aquerò èm consciènti e comprometudi en voler milhorar eth sòn estat”, comente eth baile de Vielha e Mijaran, Juan Antonio Serrano. E ahig que “sabem que i cau hèr fòrça reformes e milhores entà poder deishar-lo enes milhores condicions possibles mès, entà poder artenhè’c, cau qu’es institucions publiques e esportiues s’impliquen se volem garantir era sua viabilitat entàs pròplèu generacions. Era inversion serà plan importanta e er Ajuntament de Vielha e Mijaran non poderà assomir tota era despena, pr’amor que condicione considerablament es pressupòsti publics municipaus. Compdam damb ajudes deth Conselh Generau d’Aran e dera Deputacion de Lhèida, que permeten paliar eth deficit economic que se genère cada an, mès ei indispensable ua bona injeccion de sòs entà trabalhar en projècte de modernizacion der equipament municipau”.


HÒNT: AJUNTAMENT VIELHA E MIJARAN