Eth nau Plan Urbanistic de Bossòst se trape dubèrt ara participacion ciutadana

Er Ajuntament de Bossòst anoncièc aguesta setmana era sua propòsta entara redaccion deth nau Plan d’Ordenacion Urbanistica Municipal (POUM), que substituirà es Nòrmes Subsidiàries de 1982 e qu’apòste pera regeneracion urbana deth casc antic deth pòble entà, segontes eth Baile deth consistòri,Amador Marqués, “evitar grani creishements periferics que poguen descapitalizar-lo”.

Era propòsta de redaccion deth nau POUM se presentèc en ua reunion dubèrta a toti es vesins e vesies deth pòble, que compdèren damb dret totau de consulta e participacion.

Segontes eth Baile, “era volontat d’aguest govèrn ei arribar eth maxim consens sociau e politic entà establir es directritzes deth nau plan urbanistic e, per açò, mos trapam dubèrts ara participacion ciutadana, damb reunions setmanaus, per districtes e metent a disposicion deth public aguesta propòsta, que pòt èster consultada per qui ac volgue en madeish Ajuntament”.

Aguest Plan d’Ordenacion Urbanistica cerque “reforçar eth teishit comerciau, ostalèr e patrimonial actuaus, hènt de Bossòst un pòble singular, tradicionau e damb un ampli hilat de servicis” afirme Marqués.

En aguest POUM se prevé tanben era construccion cinc grans parcatges publics entà milhorar era mobilitat dera localitat, d’un nau pònt ena entrada sud e d’ua passarèla peatonau ara nautada dera zòna des Anglades. Ath delà, se preten desvolopar eth solèr industriau entà complementar era activitat economica.

Eth consistòri proposèc consolidar e ampliar era zòna esportiua d’equipaments, damb era possibilitat de bastir, mejançant un Plan Especiau, un Parc Esportiu de Gòlf sense aprofitament residenciau.