Eth nau "Plan de prevencion de damatges per os brun" prepause ua major vigilància sus eth bestiar

Dijaus passat auec lòc en Llavorsí (Pallars Sobirà) era presentacion deth nau Plan de Prevencion de damatges per os brun. Aguest nau programa preve refortilhar eth sistèma d’agrupament de ramats e de prevencion de damatges en aqueres zònes a on i a preséncia contunhada d'aguest animau, en tot aumentar eth numerò de pastors e assistents, e hènt mès eficaci es recorsi disponibles e er objectiu de conservacion dera espècia.

Aguest plan, desvolopat pera Generalitat de Catalonha, cerque dar responsa as pagesi locaus que pòden patir atacs ath sòn bestiar per part des ossi, atau coma garantir qu'era preséncia der os brun non sigue un inconvenient hijut en sòn trebalh. 

Enguan, era inversion entara prevencion des damatges en zònes damb preséncia der os aumente en 100.000 èuros, un 67% mès respècte ar an 2016, en tot passar de 147.000 èuros a 247.000.

Parallèlaments ad aguest programa dera Generalitat, eth Conselh Generau d'Aran contunharà dant supòrt en nòste territòri en concèpte de gestion e seguiment deth programa Piroslife.

Eth Departament de Territòri e Sostenibilitat deth Govèrn catalan informarà a toti es pagesi locaus d’ovin e cabrum qu'actuauments non s’acuelhen a d'aguest programa e que pasturen ena zòna establa der os brun, sus era convenença de realizar er agrupament e vigilància des sòns ramats mejançant eth finançament dera Generalitat.

Er agrupament que prepausen, se realizarà segontes un nombre minim de caps de bestiar. Ena ramaderia ovina e caprina, s’a prepausat contunhar damb es madeishi agrupaments que dejà foncionèren er ostiu passat: Gausac-Casau e Beret, ena Val d’Aran, e Isil, Tavascan, e Boldís-Àreu, en Pallars, en tot ahíger un de nau ena Bonaigua-Muntanyó.

En totau, s’estime que s’acuelheràn entre 6.000 e 6.500 caps de bestiar aguesta tempsada.

Eth sistèma de vigilància que contemple aguest programa compde damb era preséncia de pastors e assistents pendent tot eth dia, includides es ores nocturnes, damb eth bestiar barrat en tancats electrificats e susvelhadi per gossets de proteccion.

Ath delà, era Generalitat aufrirà ua naua assegurança que corbirà era totalitat des mòrts, damb ua franquícia de tres oelhes, tanben pes accidents atribuïdi a uns auti fenomèns (meteorologics, desaparicions,..) en tot dar responsa a ua istorica reivindicacion deth sector.  

Damb aguestes prepauses se cerque sostier era conservacion der os brun coma element de recuperacion dera biodiuersitat e coma element dinamizador, en tot hèr efectiva era coexistència damb es abitants deth territòri, e fomentar, coma producte toristic, era visita deth sòn abitat.

Eth projècte, ath delà, contribuís a fomentar era aucupacion en sector ramadèr locau mejançant era contractacion de pastors, assistents de pastor e vaquèrs. Atau, diden, se recupère eth trabalh de pastor de nauta montanha en aguest sector deth Pirenèu a on lèu s’auie perdut.

IMATGE: GENERALITAT DE CATALONHA