Eth conselhèr, Jose Antonio Boya, a negat cap tipe de vinculacion damb era mòrt der os Cachou

Eth conselhèr de Convergéncia Aranesa, Jose Antonio Boya, a estat eth prumèr implicat en cas dera mòrt der os Cachou en declarar en jutjat de Vielha. Boya, qu'a estat eth prumèr des ueit persones qu'auràn de declarar aguest mes de mai, a negat auer cap tipe de vinculacion damb era mòrt der animau, que siguec trapat mòrt en municipi de Les eth 9 d'abriu de 2020.

Boya, que se presencièc aguest dimars en jutjat, comentèc qu'ac hèc "volontariament, pr'amor que volie esclarir diuèrsi punts deth somari damb es que non i ère d'acòrd", e que volie mostrar era sua inocéncia e "ajudar entà qu'era investigacion auance".

D'aute biais, Enric Rubio, avocat d'A.M.G., er agent de Medi Ambient deth Conselh Generau d'Aran, que siguec detengut e ei un des investigats pera mòrt de Cachou, afirmèc que "demanaram er archiu dera causa pr'amor que se base en suposicions e presions des grops ecologistes. Non i a cap element indiciari ne cap indici racionau de criminalitat".

Rubio ahig que "se li acuse de passar informacion as ramadèrs dera situacion der os a trauès deth geolocalizador, que sonque emitie ua senhau ath dia, mès qu'ac hège entà alertar-les dera zòna a on se trapaue entà protegir as ramats". Tanben comente que se deconeish eth lòc exacte a on er os siguec empodoat, e que poderien empréner accions legaus pera deteccion illegau.

Enquia ueit persones son citades aguest mes de mai entà declarar per aguest cas. Son investigadi, mès tanben testimònis e non s'escarten mès citacions.


HÒNT: DIARI SEGRE