Eth Conselh trebalharà peth reconeishement ena Constitucion Espanhòla der autogovèrn d'Aran

Eth Plen deth Conselh Generau d’Aran a aprovat per unanimitat er acòrd institucionau peth quau reafirme eth sòn compromís damb era defensa des institucions e er autogovèrn dera Val d’Aran. En aguest sens, an remercat era importància deth desplegament dera Lei d’Aran aprovada en an 2015, que dus ans dempús d’èster en foncionament, lèu non a podut començar a desvolopar-se. Ath delà, eth Plen deth Conselh contemple ua naua via entà milhorar er autogovèrn d’Aran, coma ei eth sòn reconeishement constitucionau, ara qu’eth Congrès des Deputats Espanhòl a encetat ua comission especifica de modificacion dera Constitucion Espanhòla.

Ath delà, Barrera a manifestat qu’enes pròplèus 15 dies, se coneisherà er informe juridic que s’a encargat sus eth dret d’autodeterminacion qu’apareish coma era disposicion addicionau 1èra ena Lei d’Aran.

Er acòrd institucionau aprovat en plen extraordinari deth Conselh Generau d’Aran serà comunicat ath Govèrn Centrau Espanhòu, ara Generalitat de Catalonha e as desparières ajuntaments dera Val d’Aran, entà que poguen somar-se ad aguest reconeishement der autogovèrn aranés, e que pogue èster aprovat enes sòns respectius plens.