Eth Conselh executarà òbres de milhora enes parcs de Pompièrs de Les e Bossòst

Aguest ei eth Parc de Pompièrs de Les, que pròplèuments, amassa damb eth Parc de Bossòst, serà objècte d’ua sèrie d’òbres de reforma. 

En aguest sens, eth Conselh Generau d’Aran a comunicat qu’a aprovat es projèctes de melhora d’aguesti dus parcs deth Baish Aran. 

Segontes afirmen des deth govèrn aranés, ambdus parcs an de besonh ua sèrie d’actuacions entà aumentar era foncionalitat des espacis e garantir era seguretat e benèster deth còs de Pompièrs en aguesti dus pòbles.

En concrèt, eth projècte de melhora dera foncionalitat en Parc de Les, ei dotat d’un pressupòst de 72.000 euròs.

En parallel,  contemple era reparacion e repintat dera façada extèrna dera bastissa, era substitucion dera installacion electrica e er enlumenat interior. Ath delà, s’i practicarà era adequacion der humarau, a on tanben se bastirà un nau banh e s’installaràn radiadors.

Pera sua part, en projècte de melhora en Parc de Bossòst, s’invertiràn 56.000 euròs. Aquiu s’amiarà a tèrme era impermeabilizacion e renauiment deth paviment des terrasses e era retirada e substitucion deth losat actuau.