Eth Centre de Joenessa “Antara” s’assolide coma espaci de léser de referéncia entàs joeni de Vielha e Mijaran pendent eth cors escolar

Aguest centre ei abilitat entara joenessa des 12 as 18 ans. En aguest sens, enguan eth reng d’edat mès abituau ei des 14 as 17 ans, ua donada mès anauta qu’enes prumèri ans d’Antara (a on se plaçaue entre es 12 e es 15 ans), pr’amor qu’es adolescenti d’aguestes edats, ja comencèren a vier entath centre quan èren mès petiti.

Enquiara, Antara ja a aguut ua assisténcia de mès de 1700 usatgèrs, enes mès de 70 jornades qu’a estat dubèrt, damb ua miejana de 25 joeni per tarde. Ua nauta afluéncia enregistrada a compdar dera sua dubertura eth passat mes de deseme, e que supausen chifres rècord des dera sua inauguracion er an 2018.

Antara ei un equipament der Ajuntament de Vielha e Mijaran destinat ara joenessa deth municipi a on traparàn un espaci de participacion, de relacion e de dinamizacion entà favorir era coesion sociau, potenciar era interrelacion e prebotjar era plea ciutadania dera nòsta joenessa. Ei un servici public e gratuït a on era joenessa pòt trobar un ample ventalh d’informacion e orientacion sus educacion, formacion, participacion, òci, salut, cultura, léser, concorsi, viatges, mobilitat internacionau…e que compde damb professionaus en encastre dera joenessa entà assessorar-les e acompanhar-les. En aguest sens, s’i realizen activitats formatiues sus ahèrs d’actualitat e que les ajuden de cara ath futur en matéries coma: violéncia sexuau, consum d’alcoòl, expectatiues laboraus e d’estudis. Ath delà, tanben s’a començat a implementar espòrts coma badminton o tennis taula entà ajudar ara coesion sociau.

Enguan er orari de dubertura d’Antara a cambiat. Es joeni poderàn accedir-i de diuendres a dimenge des 17:30 as 20:30, en tot auer estat dubèrt entà Nadau e Pasca.


HÒNT: AJUNTAMENT VIELHA E MIJARAN