Eth Baile de Vielha s’amasse en Lhèida tà parlar dera milhora dera N-230 entre era boca sud deth Tunèl e Aubèrt
Eth Ministèri de Foment està redactant un estudi que contemple era possibilitat d’evitar eth pas de veïculs per Vielha
Eth baile de Vielha e Mijaran, Juan Antonio Serrano, s’a amassat aguest maitin damb era Sosdelegada deth Govèrn de Lhèida, Inma Manso, entà parlar deth projècte de milhora dera carretèra N-230 en tram que va dera boca sud deth Tunèl de Vielha enquia eth pòble d’Aubèrt.
Manso a explicat qu’eth Ministèri de Foment se trape en aguesti moments redactant un estudi informatiu entath condicionament e era milhora d’aguest tram de carretèra que compren er estudi de diferentes possibilitats en traçat dera N-230 qu’eviten eth pas de veïculs per Vielha.
Era Sosdelegada deth Govèrn s’a comprometut a gestionar ua amassada entre eth Secretari d’Estat d’Infraestructures deth Ministèri de Foment, Julio Gómez Pomar, e eth baile de Vielha e Mijaran entà tractar aguest projècte de milhora.
Ath delà, Juan Antonio Serrano a hèt arribar ara Sosdelegada era peticion de assenhalar enes carretères estataus dera província eth Parc Nacionau d’Aigüestòrtes e Estanh de Sant Maurici, especiaument en municipi de Vielha e Mijaran, damb er objectiu de promocionar aguest espaci naturau entre es toristes que visiten territòri.
