Eth 97% des alumnes aranesi an aprovat era Selectivitat en mes de junh

Grani resultats des alumnes aranesi pendent es pròves d'accès ara Universitat (PAU) qu'amièren a tèrme deth 13 ath 15 de junh. Un 96,67% des alumnes que i preneren part obtengueren er aprovat ena Selectivitat. En aguest sens, 29 des 30 alumnes inscrits superèren es PAU, mentre que sonque un inscrit non se i presentèc. Era nòta mieja d'aguesti alumnes que se i presentèren ei d'un 5,8 mentre qu'era nòta der expedient de Bachilierat s'a plaçat en 7,45. D'aguest biais, 29 naui alumnes aranesi començaràn un nau camin academic a trauès dera Universitat. Era preinscripcion universitària finalize eth pròplèu 3 de junhsèga. 

Era Val d'Aran s'a plaçat en 4au lòc en percentatge d'aprovats, sonque superada per Alt Urgell, Segarra e Pallars Jussà. En sòn conjunt, es alumnes dera província de Lhèida an aprovat damb un 95,4%, peth dessús dera mieja de Catalonha que s'a plaçat en un 94,02%. Era unica donada a remercar ei, qu'en çò que tanh ara nòta finau des PAU (5,8), ei era mès baisha de tota era província de Lhèida. 

Cau rebrembar qu'ena nòta d'accès ara Universitat, era mieja de Bachilierat compde un 60% mentre qu'era Selectivitat, un 40%. 

En seteme aurà lòc era 2au convocatòria de Selectivitat d'enguan. Concretaments, pendent es dies 5, 6 e 7 de seteme. Entà inscriuer-se, eth termini ei deth 18 ath 24 de junhsèga e es resultats se coneisheràn eth 18 de seteme. 



IMATGE: Alumnes pendent era Selectivitat (diari SEGRE)