Eth 18 d’octobre Proteccion Civiu harà a sonar es sirenes de risc quimic d'Aran Valhés Occidentau èst, Valhés Orientau, Sèuva, Bages e Berguedan

Proteccion Civiu dera Generalitat de Catalonha dispòse d’un hilat de sirenes de risc quimic installat enes municipis que pòden demorar afectadi per un accident en ua indústria considerada de risc quimic en rason dera tipologia e quantitats de substàncies perilhoses que trabalhe. Aqueres indústries son amassades enes plans de Proteccion civiu entà emergéncies quimiques (PLASEQTA tà Tarragona e PLASEQCAT tara rèsta de Catalonha). Es sirenes de risc quimic son pensades exclusivament entà informar ara populacion sus eth besonh de confinar-se en cas d’accident quimic que les pogue afectar grèvament.

Enguan 2023, Proteccion Civiu dera Generalitat a reprenut es pròves d’activacion d’aqueres sirenes de risc quimic dempús dera campanha de comunicacion ara populacion des mesures d’autoproteccion en cas d’accident quimic, a on s’a refortit era idèa deth besonh deth confinament. 

Er objectiu des pròves de sirenes de risc quimic ei de verificar que foncionen corrèctament e, ar encòp, familiaritzar ara populacion damb es sons d’avís. Era activacion des sirenes de risc quimic se preve tostemp e exclusivament en cas que calgue eth confinament dera populacion en rason d’un accident quimic grèu.

En tot profitar era reprenuda des pròves, se n’a actualizat eth format damb er objectiu de territorialitzar-les e poder arribar melhor ara populacion afectada.


Atau, eth 18 d’octobre de 2023 entàs 11 ores se realizarà era pròva des sirenes de risc quimic plaçades ena Catalonha Centrau (Bages e Berguedan), en Aran e en èst der airau metropolitan de Barcelona en tot includir era zòna de Tordera (Valés Occidentau èst, Valés Orientau e Sèuva). Concrètament, s’activaràn es sirenes de risc quimic des municipis següents:

Vegaria dera Catalonha Centrau:

- Bages: Castellgalí (1) e Sant Vicenç de Castellet (3)

- Berguedan: Puig-reig (1)

Vegaria de Barcelona:

- Valhés Occidentau èst: Polinyà (2) e Santa Perpètua de Mogoda (1)

- Valhés Orientau: Granollers (3), Gualba (3), Montornès del Vallès (2), Parets del Valés (1) e Sant Celoni (2)

Vegaria de Girona: 

- Sèuva: Riells i Viabrea (1) 

Vegaria deth Naut Pirenèu e Aran:

- Val d’Aran: Les (1)

Ath delà, se preve qu'aqueres sirenes tanben se senten enes municipis de Barberà del Vallès, Canovelles, Les Franqueses del Vallès, Lliçà de Vall, Montmeló e Vilanova del Vallès, pera sua proximitat.

Ua nauetat que s’incorpòre enguan ei qu'era populacion, ath delà de sénter era sirena, tanben arreceberà ua alèrta en mobil en tot informar deth començament dera pròva e dera activacion des sirenes. Era alèrta en mobil se poderà arrecéber tanben en quauqui municipis limitròfes adès indicadi d’a on se placen es sirenes.

Quinze menutes dempús dera activacion iniciau se tornaràn a activar es sirenes de risc quimic aguest viatge damb era son de fin de confinament e finalizarà era pròva. Non i aurà cap d’enviament d’alèrta en mobil ena finalizacion dera pròva.

Damb er objectiu d’avalorar eth foncionament des pròves d'alèrtes, s’a premanit ua enquèsta damb un qüestionari brèu entà qu’es ciutadans poguen reportar se l’an escotada adequadament e an arrecebut er avís en mobil: https://arcg.is/1mS58z0

En tot, es zònes de cobertura teorica d’aqueres 12 sirenes includissen un recensament de mès de 112.000 persones, cossent damb es donades der Idescat.

Enes municipis anteriors se placen 53 establiments de risc quimic que hèn part dera espandida deth PLASEQCAT. Ua donada similara ath nombre d’indústries des poligòns quimics de Tarragona.

Eth son d’inici des sirenes per risc quimic ei de tres senhaus d'ua menuta de durada separada per silencis de cinc segons. Eth son de fin d’alèrta ei un senhau continú de 30 segons de durada. 

En cas reau, en cas de sénter era sirena e arrecéber era alèrta en mobil cau confinar-se ena bastissa de mès apròp e demorà’i enquia que s’acabe er avís.

Es sirenes de risc quimic de Catalonha son plaçades enes zònes de populacion qu'es estudis de seguretat industriau determinen que pòden demorar afectades grèvament per un accident quimic enes indústries que trabalhen damb granes quantitats de substàncies quimiques. Entà saber se viuetz en ua d’aqueres zònes afectades peth risc quimic, podetz consultar era Mapa de Proteccion Civiu de Catalonha.

Profita aguestes pròves entà méter en practica es mesures d’autoproteccion. Confina-te. Participa

Mès informacion en: interior.gencat.cat/riscquimic