Espòrt Popular: era iniciatiua que fomente era activitat fisica

Er Ajuntament de Vielha e Mijaran aufrís entà toti es amants der espòrt eth nau programa “Espòrt Popular”, que cerque fomentar era activitat fisica de toti es vesins e vesies sigue quina sigue era sua edat o condicion.

Aguesta activitat ei organizada peth consistòri amassa damb eth Conselh Esportiu dera Val d’Aran, e aurà lòc totes es setmanes de deluns a dijaus.

Er objectiu der Ajuntament ei promòir es valors qu’er espòrt proporcione, coma eth trebalh en equipa o er entendement, ath delà de cercar tanben qu’es ciutadans agen ua vida activa e saludable.

Era iniciatiua Espòrt Popular aufrís era oportunitat de practicar un espòrt diferent cada dia. 

Se vos agrade er espòrt o auetz ganes de practicar-ne acompanhats per mès gent dera Val d’Aran, non dobtetz en apropar-vos ath Palai d’Espòrts o ara sala polivalenta de Vielha de deluns a dijaus de ueit a detz deth ser.