Es partits deth Conselh pacten un acòrd en defensa der autogovèrn dera Val d'Aran

Es portaveus des diuèrsi partits damb representacion en Conselh Generau d’Aran s’an amassat ena comission d’ahèrs institucionaus entà analisar era situacion politica que se viu en Catalonha e en Aran. Era institucion aranesa se mòstre preocupada deuant der scenari dera declaracion dera naua Republica Catalana e des efèctes dera aplicacion der article 155 dera Constitucion Espanhòla en autogovèrn aranés. Per açò, coma comente eth síndic d’Aran, Carlos Barrera, es desparièrs partits que hèn part deth Conselh, an decidit aprovar un acòrd institucionau de manèra conjunta.

 Aguest acòrd institucionau se someterà a debat e a votacion aguest pròplèu dijaus 2 de noveme, en un plen extraordinari que se celebrarà ena sedença deth Conselh en Vielha. Çò qu’ei evident, ei qu’era Val d’Aran non se qüestione, de moment, un cambi en marc politic actuau en relacion a Catalonha e Espanya. Eth dret d’autodeterminacion des aranesi reconeishut ena Lei d’Aran, per tant, non se harà efectiu en scenari politic actuau.