Es condes de Kamishibai promoiràn er aranés enes escòles dera Val d’Aran

Eth Departament de Politica Lingüistica deth Conselh Generau d’Aran a iniciat un recors mès entà promòir er aranés a nivèu orau enes estudis.

Aguest recors consistís en desplaçament per totes es escòles d’educacion infantil araneses d’ua relatora de condes Kamishibai. Aguest ei un sistèma japonés qu’imite un petit teatre d’husta peth quau passen imatges de carton ath madeish temps que se relate ua istòria.

Se tracte d’ua activitat fòrça adecuada entà mainatges de 2 a 5 ans e que se realizarà enquia mai d’aguest madeish an.

Kristina Nart a estat seleccionada peth Conselh tà encuedar-se d’aguestes sessions, que duraràn ua ora e enes quaus dempús deth conde en aranés s’haràn activitats relacionades damb era istòria.

Es condes escuelhuts son un prèst deth Centre Interregionau de Desvolopament der Occitan (CIRDOC) gràcies a un conveni damb eth Govèrn d’Aran.

IMATGE: CONSELH GENERAU D'ARAN