AUE TV
    1. AUE TV

    Era Val d’Aran, scenari dera pròva d’exteriors de MasterChef eth proxim deluns

    27/04/2022

    Eth programa, que siguèc gravat enes installacions dera estacion d’esquí aranesa Baqueira Beret, s’emitirà eth deluns, 2 de mai, entàs 22:10 ores en La 1

    Eth jurat e aspirants dera naua edicion deth talent show gastronomic MasterChef, produsit per RTVE en collaboracion damb Shine Iberia, visitarà era Val d’Aran en sòn tresau programa. Era emission aurà lòc eth deluns, 2 de mai, entàs 22:10 ores en La 1.


    Era pròva d’exteriors, ena qu’es aspirants auràn de premanir eth prumèr codinat esquimau dera istòria deth programa, siguec rodada en entorn iuernau aufrit per Baqueira Beret.


    Entre es 120 comensals que degustèren er originau menu elaborat pes aspirants se trapauen: era sindica d’Aran, Maria Vergés, es conselhèrs d’Economia, Torisme e Promocion Economica, Juan Antonio Serrano e Josep Canut, era conselhèra de Naues Tecnologies e Innovacion, Angela Cases; eth director comerciau de Baqueira Beret, Xavi Ubeira; eth president deth Grèmi d’Ostalaria dera Val d’Aran, Xacobe Bartolomé, ath delà des alumnes e professors dera Escòla d’Ostalaria dera Val d’Aran.

    Eth conselhèr Canut manifestaue que: “deth departament de Torisme deth Conselh Generau d’Aran ençà se realize pendent tot er an un intens trabalh de promocion deth nòste territòri e auem collaborat estretament entà qu’aguest programa s’age podut gravar en Aran, pr’amor qu’entenem qu’era preséncia deth nòste territori en MasterChef supausarà ua grana promocion a nivèu nacionau e internacionau qu’animarà a fòrça gent a visitar-mos”.


    HÒNT: CONSELH GENERAU D'ARAN 
    Manu Moga
    Tornar