Era Val d'Aran entre ena fasa 3

Dempús dera bona evolucion dera pandèmia deth coronavirus, era Val d’Aran a entrat dejà ena fasa 3 dera desescalada, era darrèra entà arténher çò que dejà se coneish coma era naua normalitat. 

En aguesta fasa son permetudes es amassades d’enquia 20 persones e se daurissen es barres des bars, tostemp en tot respectar era distància de seguretat entre clients. Ath delà, er aforament en interior de bars e restaurants passe ara a èster deth 50%. Pera sua part, es terrasses poiràn daurir ath 75% dera sua capacitat. 

En çò que tanh ara mobilitat, es abitants dera region deth Naut Pirenèu e Aran non poiràn gésser d’aguest parçan sanitari, pr’amor qu'ei entornejat per regions que se trapen encara en fasa 2. 

Un aute des ahèr subergessenti en aguesta desescalada ei que des deth passat dijaus 4 de junh era Residéncia Sant Antòni de Vielha dejà pòt acuélher visites. Aguestes, non se pòden alongar mès de 30 menutes e s’amien a tèrme en un espaci net damb es distàncies mercades e  dispositius de seguretat coma mampares de policarbonat e mascaretes.