Era Val d'Aran clame mesures urgentes contra es atacs des ossi

Er atac contunhat des ossi ath bestiar dera Val d’Aran pendent es darrères setmanes a provocat que diuèrsi sectors deth territòri comencen a parlar en tot demanar mesures urgentes entà esvitar qu’era situacion s’acabigue de complicar encara mès. Lèu ua dotzena d’atacs enes darrèri quinze dies, e que s’agen vist diuèrsi exemplars ath cant des pòbles, comence a acabar damb era paciéncia de pagesi e polítics. En aguest sens, eth president dera Associacion deth Shivau Pirinenc Català dera Val d’Aran, Tònho Boya, afirme qu’eth Conselh Generau d’Aran vò era percaça der os Goiat, mès era Generalitat seguís damb era intencion de mantier aguest projècte.

D’aute biais, tanben comencen a gésser veus contra era preséncia der os entre era administracion locau. Eth baile de Les, Emilio Medan, cre que’era Generalitat non decidirà actuar enquia que non i age problèmes damb es èssers umans. Ath delà, se sent enganhat pera administracion catalana.

Fin finau, eth pròplèu dimars, eth partit dera oposicion en Conselh Generau d’Aran, Unitat d’Aran-PSC, presentarà ua mocion en plen tà demanar que i age supòrt per part dera institucion politica aranesa ath sector agropasturau, qu’ara madeish se sent indefens, coma comente eth pòrtavotz d’Unitat d’Aran en Conselh, Paco Boya.

Damb tot aguest malestar, semble qu’enes pròplèus dies, s’aurà de decidir tà on va eth projècte Pyroslife, pr’amor qu’un sector majoritari dera societat aranesa se mòstre en contra dera preséncia des ossi en territòri e mès, quan se desconeish era chifra exacta d’exemplars que i a.